ആരോ ഉപേക്ഷിച്ചതാണ് സുന്ദരിയെ. ജനിച്ചപ്പോൾ തന്നെ .ചിറ്റപ്പൻ എടുത്ത് വളർത്താൻ കെട്ടിയിട്ടു.മദ്യലഹരിയും ഒപ്പം സ്നേഹവും കൂടുമ്പോഴൊക്കെ ചിറ്റപ്പൻ അവളെ അടിക്കാൻ തുടങ്ങി. ഒരിക്കൽ കഷ്ടം തോന്നിയ എന്റെ അമ്മ കെട്ടഴിച്ച് വിട്ടു. പിന്നെ എന്റെ വീട്ടിലെ സ്ഥിരം സാന്നിധ്യമായി. ആഹാരം കിട്ടിയപ്പോൾ നന്ദിയോടെ അവിടെ കൂടി.
അച്ഛന്റെ അപ്പച്ചിയാണവൾക്ക് സുന്ദരി എന്ന പേരിട്ടത്. ഒരു സുന്ദരിയായ മനുഷ്യ സ്ത്രീയുടേത് പോലെ തോന്നിയിരുന്നു അവളുടെ മുഖവും. പെട്ടെന്നവൾ എല്ലാവര്ക്കും പ്രിയങ്കരിയായി. അലഞ്ഞു നടന്ന അവൾ തീരെ ചെറുതിലെ ഒന്ന് പ്രസവിച്ചു. ഒരു കുട്ടി മാത്രം. സുന്ദരിയെപ്പോലെ സുന്ദരക്കുട്ടൻ. അതും ഇടക്ക് വീട്ടിൽ വരാൻ തുടങ്ങി. അത് വരെ കോഴിയെ അല്ലാതെ ഒന്നും വളർത്തിയിട്ടില്ലാത്ത ഞങ്ങൾ അതിനെ വളർത്തിയാലോ എന്ന് ആലോചിച്ചു. പിന്നീടതിനെ കാണാതായി. ചിറ്റപ്പൻ മറ്റാർക്കോ കൊടുത്തിരുന്നു.
ഇടക്ക് സുന്ദരിയെ കെട്ടിയിട്ടു വളർത്തിയാലോ എന്ന ഞങ്ങൾ ആലോചിച്ചു. അവളുടെയും ഞങ്ങളുടെയും സുരക്ഷയെ കണക്കിലെടുത്തതായിരുന്നു അത്. ഒരു ചങ്ങല വാങ്ങി മതിലിൽ ചേർന്ന് നിന്ന ചെമ്പരത്തിയുടെ ചോട്ടിൽ കെട്ടിയിട്ടു. സ്വാതന്ത്ര്യം ജന്മനാ നേടിയെടുത്തിരുന്ന ആ ഫെമിനിസ്റ്റ് അസ്വസ്ഥതകൾ കാണിച്ചു. കിടന്നുരുണ്ട് വെപ്രാളം കാണിച്ച് മതിലിനപ്പുറത്തേക്കൊരു ചാട്ടം. ചങ്ങല കഴുത്തിൽ തൂങ്ങി കുറെ പിടച്ചു. പിന്നീടെങ്ങനെയോ ഊരിക്കൊണ്ട് പാഞ്ഞു. അവൾക്ക് ചില ലോക്കൽ കാമുകന്മാരുണ്ടായി. അതിൽ പ്രധാനി കണ്ടാൽ നോക്കാൻ തോന്നാത്ത ഒരു ചാവാലി. പ്രേമത്തിന് കണ്ണൊന്നും ഇല്ലെന്നല്ലേ.ഞങ്ങടെ കണ്ണ് വെട്ടിച്ച് വീടിന്റെ ടെറസ്സിലൊക്കെ അവർ സമയം പങ്കിട്ടും. ആരെങ്കിലും അപ്രതീക്ഷിതമായി ചെന്നാൽ പെട്ടെന്ന് അവൾ മാത്രം ഓടി വന്ന് സ്നേഹം കാട്ടും. കാമുകനെ മറയ്ക്കുന്നതാണ്. കാമുകൻ മറ്റൊരു വഴിയേ അപ്പോഴേ കടക്കും.
